Në bisedën e saj në Harabel, një platformë e re për artin pamor në Tiranë, Eleni Laperi do të trajtojë influencat e forta që sistemet politike kanë ushtruar mbi artin pamor në Shqipëri. Ajo do të ndalet në periudhën e komunizmit, për të vazhduar me post-komunizmin dhe tranzicionin. Laperi (lindur në Tiranë në vitin 1949) është studiuese, kuratore dhe kritike arti. Ajo u diplomua për pikturë nga Instituti i Lartë i Arteve në Tiranë në vitin 1972. Laperi u emërua si dizajnere e revistës “Shqiptarja e Re” (1972-1980) dhe e byrosë së modeleve në Ndërmarrjen Kartografike në Tiranë (1980-1989).
Në 1989 u emërua kuratore e Sallonit Shtetëror të Artit, për të kaluar më pas në vitin 1993 në Sektorin e Studimeve në Galerinë Kombëtare të Artit në Tiranë, ku punoi deri në vitin 2000. Është ndër themeluesit e revistës PamorART, botim i Galerisë Kombëtare të Arteve, dhe kryeredaktore e saj (1999) dhe nismëtare e Programit të Edukimit në G.K.A. (2000). Laperi ka kuruar ekspozita të artit pamor në Shqipëri e disa vende të tjera. Është autore e artikujve mbi artin shqiptar, e librave dhe përkthimeve mbi artin dhe kulturën. Së fundmi, Laperi është duke kryer një studim mbi autorin Kolë Idromenon, themelues i pikturës realiste shqiptare dhe mbi zhvillimin e artit shqiptar nga viti 1883 deri më 1945. U zgjodh kryetare e bordit të Galerisë Kombëtare të Arteve në vitin 2018. Jeton dhe punon në Tiranë.
